أغنية من شباب مصر: القبطان اسمه برادعي

أكثر ما اعجبنى امتزاج صوت الاذان باجراس الكنيسة فى اشارة الى وحدة المصريين و حلمهم المشترك.

و ليكن الامر واضح فالهدف هو التغيير و ليس ترشيح الدكتور البرادعي, الهدف ليس شخص بل مصر و حق شعبها في تداول السلطة و نزاهة الانتخابات و لكن تاريخيا دائما يحتاج المصريون لقياده يلتفوا حولها فظهر د.البرادعي كقيادة و واجهة مشرفة دوليا فألتف حوله المصريين من أجل تغيير الدستور و انطلقت الحملة من أجل غد أفضل لنا و للأجيال القادمة.

 

تلك الأغنية تذكرنى بأغانى الشيخ إمام و عبد الحليم...لحن رائع و صوت عذب و كلمات صادقة فاخترتها رنة لموبايلى

أعتقد أننا نحتاج حقاً إلى هذا النوع من الأغانى الآن.. كفانا حباً ورومانسية نستيقظ بعدها على واقع مظلم، نحن نحتاج الان إلى أغانــى تلمس واقعنا لا قلوبنا.. فتدفعنا للامام و تلهب حماسنا من اجل تغيير مرارة الواقع... كفانا خيالاً وتعالوا نهبط إلى الأرض ونرى ما تحتاجه بلدنا وما يحتاجه شعبنا ونغنيه

هيلا هيلا وهيلا وهيلا .. مع بعض تهون الشيله..

هيلا هيلا يا بحر الأوطان..

المركب محتاج قبطان..

والقبطان اسمه برادعى

و التغيير بالحرية و الحرية ماهيش منحة 

فكك من نومك و اصحى نعدل مع بعض الشيلة

هيلا هيلا وهيلا وهيلا
و هانت يا شباب راح نفتح للنور أبواب

و الأبواب محتاجة رجال عزيمتها بتهد جبال

لو متنا عشان التغيير ارحم ما نموت من الطوابير

يا طوابير العيش و الغاز يلا سوا نحل الالغاز و نلملم شمل العيلة

هيلا هيلا وهيلا وهيلا .. مع بعض تهون الشيله

كلها مسامير فى النعش..كليب اطلق رصاصك

احنا بقينا عاملين زى المعازيم فى فيلم بداية و نهاية لما كان فريد شوقى بيغنى و صوته وحش اوى و الناس مش طايقاه  لكن كل ما مواطن من المعازيم يعترض على صوته يقوم فريد بعضلاته يضربه و يقوله اقعد و يرجع يغنى تانى بصوت وحش و يقول طيب و الله زمان... زمان و الله....فيصرخ واحد تانى منهم فيقوم فريد يضربة على قفاه و يقوله اقععععععد و يغنى تانى!

كأننا محتلين و ماعندهمش غير الامن يسيطروا بيه...يعنى بيضربوا كل الفئات و بيستعملوا القهر مع ان الحل بسيط و مطالب الشعب مشروعة و هي ابسط حقوقه مش منحة من حد و لا البلد ملك فرد

رد فعل النظام السلبي تارة و القمعى تارة هو اهم عامل مساعد بيؤدى لاتحاد كل الفئات على اختلاف انتماءتهم و اعتقد ان البوستر اللى طبعه حزب الغد و اتقبض على شبابه و همه بيلصقوه بيدل على كده و بالرغم انه مجرد صورة لكن واضح ان حتى الصورة اصبحت مخيفة لهم و تتطلب القبض على مرويجيها

يوم بعد يوم الدائرة بتوسع و أفراد و فئات اكتر بينضموا مش لانهم سياسين لكن لانهم مواطنين مصريين و مطلبهم مطلب وطنى... الحق فى الحياة الكريمة

اترككم مع كليب اطلق رصاصك..كلمات مصطفى الجوهرى.. مهدى من حركة 6 ابريل

أضربونا بالرصاص..مجددة

رددوا هتافات كثيرة و لكن فى الفيديو اسفل هتاف جديد أحزننى كثيرا ان يكون النظام اوصل الشعب لمثلة لانه خارج عن تقاليد و اخلاقيات المصريين و لكن لا استطيع ان ألومهم!!!

وقفة شباب 6 أبريل و اعضاء من كفاية و الغد و الكرامة و بعض نواب مجلس الشعب أمام مجلس الشعب يوم 20-4-2010 ، ضد دعوات نواب الحزب الوطني بإطلاق الرصاص علي المتظاهرين المطالبين بالتغيير والتعديلات الدستورية

فيديو لاهالى الاسكندرية ضد دعوه اعضاء مجلس الشعب باطلاق الرصاص..مين الزفت؟

ارحل ارحل زى فاروق

عنوان البوست هو الهتاف اللى فى اول فيديو لمظاهرات ابريل لكن مش ح اقدر اكتب عن تانى فيديو لان كلامه جامد و "جديد" و كفاية انى بنشره و رزقنا على الله بس عمااااار يا مصر و يا أحلى شباب فيكم و بيكم الأمل و ربنا قادر على كل شىء

 الصحفية نور الهدى زكي زوجة الكاتب الراحل محمد السيد السعيد تقود الهتاف...تحية لنساء مصر

هتافات جريئة جدا لم تذاع فى مظاهرة 13 ابريل

في أقل من اسبوع تكررت المظاهرات و لكن بجرأه أكبر امام دار القضاء العالى حيث  اشتبك لاول مرة المتظاهرون مع الشرطة فلم يكن الضرب من جانب واحد فقط كالعادة!

هتافات جريئة جدا جدا

هتافات قوية و جريئة من نساء مصر الباسلات اللى بالف راجل من عينة اللى بيضربوهم

مشادات بين الأمن والمتظاهرين في مظاهرة 13 ابريل 2010

لمتابعة المزيد من فيديوهات المظاهرات اختار من شريط الاخبار أعلى الصفحة

هتفوا تحيا مصر فضربوهم

يوم سته ابريل خرجت مظاهرات تنادى بتعديل الدستور...و الدستور هو القانون اللى بيحكم علاقة الدولة بالشعب يعنى مش شتيمة و لا حاجة...الناس اتضربت و هى بتهتف تحيا مصر

ياريت نتأمل الصور و نحاول نفهم ليه ضربوهم؟

أ‌. عشان المتظاهرين دول مش مصريين

ب‌. عشان ده مش الأمن بتاعنا

ت‌. عشان المفروض يقولوا تحيا السنغال

ث‌. عشان.............. ؟

اكثر ما لفت نظرى فى فيديوهات 6 ابريل الفتاة المذعورة التى تظهر فى اول فيديو و هى تصرخ هلعا ... و السيدة الاربيعينية التى تظهر فى الفيديو الثانى و اثار الضرب واضحة على وجهها فلا رابط بينهما سوى....تحيا مصر

مصدر الصور جريدة اليوم السابع

يا ضلالي

انتقد المستشار عدلي حسين محافظ القليوبية تحركات الدكتور محمد البرادعى في قيامه بالصلاة بالحسين والمنصورة وحضور قداس بكنيسة العباسية في الكلمة التي ألقاها المحافظ خلال زيارته لمطرانية بنها للأقباط لتقديم التهاني بمناسبة عيد القيامة المجيد. وجه حسين إنذارا شديد اللهجة للذين يمارسون العمل السياسي بعدم اتخاذ المساجد والكنائس والمدارس والمصالح الحكومية مكانا لأغراضهم السياسية. (صحيفة اليوم السابع)

جميل اوى و فعلا لا سياسة فى الدين و لا دين فى السياسة لو الاوضاع طبيعية لكن قولنا فى الوضع الحالى عايز الناس تلتقى فين مادام الشوارع ممنوعة بقالها تلاتين سنة طبقا لأننا الدولة الوحيدة في الكرة الأرضية اللي فارضة حالة الطوارىء بقالها ثلاث عقود؟

و بعدين لما هو لا سياسة فى الدين ليه سيدك جمال مبارك كان بيروح القداس كل سنة؟ و ليه بعد ظهور د.البرادعى و لأول مرة لم يذهب هذا العام؟

و لما هو كده و لا سياسة في الدين ليه عينوا شيخ أزهر جديد عضو فى لجنه السياسات في الحزب الوطني؟ و ليه نائب رئيس جامعة الأزهر بيهاجم البرادعي في جريدة قومية...مش دي سياسة و ده دين؟

و لما هو كده ليه الأمن أصر على تغيير أمام مسجد النور في المنصورة أثناء خطبة الجمعة يوم زيارة الدكتور البرادعى و خلى الخطبة اللي ورد فيها اسم مبارك ثلاثة و اربعين مرة عن طاعة أولى الأمر منكم على طريقة الفنان حسن البارودي شيخ القرية في فيلم الزوجة التانية لما كان بيحرف الدين عشان يخلى الفلاح الفقير شكري سرحان يطلق مراته سعاد حسني عشان العمدة عينه منها و عايز يجوزها بحجة أن دي طاعة أولى الأمر منكم؟

و لما هو كده ليه مرشد الإخوان الأسبق مهدى عاكف أعلن إن الحزب الوطنى كان بيعمل مع الإخوان صفقات من اجل مقاعد مجلس الشعب؟ مش الحزب الوطني بيقول الإخوان جماعه محظورة و بتدخل السياسة فى الدين...طيب بتتعاملوا معاهم ليه؟

و لا هو حرام على الشعب و حلال عليكم؟

كثيرون هم من يضلوا الناس و الغريب أنه ينتابهم شعور أننا أغبياء أو بلا ذاكره

الهتافات التى لم تذيعها الفضائيات

  

مظاهرة الحد الادنى للاجور امام مجلس الوزراء يوم 3 ابريل...اتركها بلا تعليق

تصوير بسمة زهران"المركز المصري للحقوق الإقتصادية والإجتماعية"

لمشاهدة صور و فيديو مظاهرات 6 ابريل حينما هتفوا تحيا مصر فضربوهم اضغط هنا

هوهو السلطة

بمناسبة تقليد "هوهو" السلطة لفيلم الكابوس بتاع ابو حفيظة

المنافق عندنا فى مصر أصبح فخور جدا بنفاقه لدرجة إنه ناقص يعلق بدج أو كارنيه على صدره مكتوب عليه أنا منافق!!

أو يكتب عليه زميل الكلية الملكية للنفاق بالقاهرة!!

وعضو الجمعية الوطنية للنفاق بالحزب الوطنى!!

وأستاذ مساعد بالمعهد العالى للنفاق فرع الأزهر !!

وتبدأ الدول الأخرى فى إرسال بعثات بمنح دراسية للدراسة عندنا نظرا لتفوقنا وبراعة أساتذتنا فى هذا المجال الذى شهد لنا العالم أجمع فيه..وبعد كده نعمل جايزة عالمية موازية لجايزة نوبل والمرة دى نسميها جايزة محمد على إبراهيم !!

وتقدم كل عام لأفضل مبدع فى النفاق ويحضرها مندوبين من كل دول العالم الثالث.. واللجنة المانحة للجائزة لابد أن تتكون من أفضل علمائنا وأقترح أن تضم .. المبدع محمد على إبراهيم وكرم جبر وعبدالله كمال و عمرو أديب و تامر أمين و ماعرفش إيه السمرى و مصطفى بكرى و عادل إمام .ويمثل الدولة فى هذه اللجنه مفيد شهاب والرايق على الدين هلال... ثم يقام إحتفال عالمى لتوزيع الجوائز يحضره جميع الحكام العرب..ويحيي الحفل نخبة رائعة من المطربين المصريين وعلى رأسهم شيرين و عمرو دياب و هانى شاكر وشعبولا!!

وأعتقد إن مهرجان زى ده هيعمل ترويج رائع للسياحة لأن السياح لأول مرة سيشاهدون حديقة حيوان بشرية مفتوحة!!!

Written by Gedo

بقلم المعلق جدو نقلا عن جريدة الدستور