اقتراح بجلد أو حرق أطفال الحضانة...ايه رأيكم؟

كل ما نفرح و نقول جابو وزير جديد و اترحمنا من غباء اللى قبله نلاقى نفسنا بنترحم على ايام زمان و بنقول ياريت يرجعوا الاولانى.

اخر عبقرى... قصدى وزير للتربية و التعليم ...و خدوا بالكم و من كلمة التربية دى......و المفروض كمان انه دكتور و استاذ جامعى...أحمد زكى بدر باشا...راح مجلس الشورى و قالهم المدرس بقى ملطشة...يا ترى ليه يا ولاد؟..... قال عشان لغينا الضرب فى المدارس!!

ده مش افترا عليه ...الخبر هنا و كمان برر ده بان فخامته نفسه كان بيضرب و هو طفل و بالتالى هو مش محتاج طبيب نفسى و لا حاجة...و يتعالج من العقدة ليه؟

 ما يعقد الاجيال كلها أسهل و بكده يبقى مافيش حد أحسن من حد و لا تعايرني و لا أعايرك.

يا سلام ....يعنى المدرس ضاعت هيبته مش عشان مرتبه مايكفيش عيش حاف و لا عشان مافيش قيمة تعليمية و لا عشان الأسعار في غلاء جنوني و لا عشان الدروس الخصوصية اللى خلت الطالب يتحكم فيه و لا عشان أصلا اغلبهم غير مؤهلين للتدريس و ما يعرفوش حاجة عن نفسية الطفل انما عشان مافيش ضرب و اعتداء على الأطفال

ايوه أطفال لأن طبقا لتعريف الأمم المتحدة اى انسان تحت سن الثامنة عشر طفل

الوزير الفذ المستفز شايف ان الضرب هو الحل...شعار حزبه البلطجة هى الحل.... لأعاده هيبه المدرس...مش التربية و لا العلم و لا الأخلاق ولا رفع مستوى الاداء أو الأجور.

و انا كمواطنة صالحة جدا و مواليه خالص و بتحب الحكومة و بتسمع كلامها و هى مغمضة عينيها و سادة ودانها باؤيد سيادته و بقترح نخليه حرق او أحسن جلد فى ميدان عام للاطفال بدل مجرد الضرب على أساس ان كده أسهل في تمريره و ممكن نكيف الموضوع قانونيا و نجيب واحد من مشايخ البزنس بتوع الفضائيات يحلل جلد الطلبة و كام واحد يطلعوا يؤيدوه استنادا للمادة التانية فى الدستور و بكده نخرس ألسنه بتوع حقوق الإنسان الاغبيا اللى مش قادرين يفهموا ان عندنا خصوصية و اننا لا نعترف بوجود إنسان أصلا عشان يبقاله حقوق كمان!!

و كل وزير و أنتم طيبين و صابرين!