شخصية الدبانة

من صغرى كنت اسمع إن كل حاجة فى الدنيا و ليها فايدة حتى لو كانت سلبية فاكيد ليها جانب ايجابي و فيه سبب لوجودها حتى لو إحنا مش عارفينه

يعنى كل شيء و له سبب و له فائدة مهما بدا لنا مزعج!

مش عارفه دى مقوله صح و لا لأ لكن كتير اوى كنت بسمعها و مرة قعدت أفكر فيها و خدت مثال الذبابة اللى بنسميها بالعامية دبانه

طيب يا ترى دى ايه فايدتها او ميزتها فى الحياة و كان ح يحصل ايه لو مش موجودة؟

الدبانة حشرة متطفلة فضولية تأتي لك لتحاصرك ...غالبا فى وقت او مكان بايخ زيها....و تزن على دماغك و تفرض نفسها بدون سبب...فانت لم ترحب بها و لم تدعوها اساسا و لا تريدها و هشتها كتير بالذوق و برضة تلف و تدور عليك و ترجعلك تانى .....و ززززززززززززززززززززززززز

و تزززززززززن جنب ودنك....يعنى هى حشرة مملة و مالهاش لازمة بالنسبه لك لكن مافيش فايدة برضة لازقالك لازقالك..... لان تقريبا مش لاقيه حاجة تعملها فبتقول ارمى بلايا اهو اضيع وقت...ما اكيد دماغها فاضية!!

بس لما قعدت اتأمل اكتر...................... اخيرررررا اكتشفت فايدتها

فايدتها الأساسية تنبع من ان فيه بشر بيحبوا ياخدوها مثل و قدوة و بيقلدوها تماما...اكيد كل واحد فينا قابل على الأقل واحده من تلك الشخصيات الدبانية سواء فى الواقع او فى العالم الافتراضي.... أو فى الجو!!!

هى شخصية متنطعة او بالبلدى غاوية رمى جتت

عارفة تماما انه غير مرغوب فيها و انها لا تمثل أهمية بالنسبه لك لدرجة انه ممكن يكون اتقالها بصريح العبارة مش عايزين لكن برضة تصر تتواجد حواليك ...اهو تززززززززن و تحشر نفسها فى اى حاجة تخصك و خلاص يمكن تحس ان ليها فايدة فى الدنيا

الشخصية دى مش بينفع معاها لا بايجون و لا بيرسول لكن بينفع معاها طريق تانية مجربة...يا ترى عارفينها؟