في جامعة الفرنجة

اسوأ شىء انك تلاقى نفسك بتنام و مش بتحلم غير بالانجليزي!

فترة الجامعة كانت من أجمل فترات حياتي لأنها مش بس مرحلة جديدة لكن كمان مجتمع مختلف تماما عن مجتمعنا المصري و يمكن كان الشيء الوحيد اللي بجد مضايقنى ان مرور الشهور عليه و أنا مش لاقيه حد بيكلم عربي و لا فيه قنوات تلفزيون عربي بتوصلي قلب أحلامي و كوابيسي للإنجليزية و أنا أصلا مش بحب الأفلام الأجنبى و بحس أنها بعيدة عن بيئتنا فكنت بصحى متنكده جدا!

كلنا على اختلاف جنسيتنا كنا بنتفاهم بالانجليزى مش بس لان دي اللغة الأكثر استخداما فى تلك البلد لكن لان الجامعة كان ملتحق بيها طلبة من حوالي خمسين دولة و طبقا لسياسة الجامعة يجب أن تجمعنا لغة واحدة و ثقافة واحدة و هي ثقافة التعددية التي ترسخها الجامعة مش بس من خلال أن الأساتذة من جنسيات مختلفة...أوروبي و أفريقى و امريكى و استرالي و كندى و آسيوي

لكن كمان في كل مناسبة و في كل ركن لان ما فيش تمييز بين الناس على أساس اى شيء و لا حتى السن لدرجة أن تم توزيع أوراق علينا في أول يوم فيها تعليمات من بينها أن كل شخص يجب أن ينادى الناس باسمهم الأول دون لقب حتى لو كان الطالب يخاطب عميد الجامعة البروفيسور "رودني هيلز" ذو السبعين عام.....كان مشهد طبيعى ان ترى عامل الكافيتريا او طالب عنده سبعتاشر سنه بيصبح على العميد عند البوابه مثلا و يقوله هاى رودنى!!

طبعا أنا كواحدة جاية من ثقافة مختلفة كنت بأجد صعوبة في التأقلم على الموضوع ده بالذات فى الأول... كمان كنت بستغرب اوى قد إيه بيحترموا الطالب لدرجة إن مرة كنت داخلة لمكتب موظفة في الإدارة و في الطريق المؤدي رأيت عميد أحد الكليات (بريطانى فى الخمسين) و واضح انه متجه لنفس الموظفة فتباطأت لأفسح له الطريق عشان يدخل قبلي تأدبا فوجدته يلتفت لى و يقول: أنتي سبقاني بخطوات من البداية و هو حقك أن تنهي معاملتك أولا!

و تشوف بروفيسور داخل الصبح مبتسم و بيحيي جميع الطلبه و بيسلم على ساعي المكتب باليد... و لم يكن العميد نفسه يجد اى غضاضة فى انه يمسك فوطة صفراء و ينظف تراب مكتبه .... كنت بشوفه لان حوائط المكاتب من الزجاج!

و طبعا بديهي أن تجد عميد الجامعة نفسه مش بس الاساتذة و عمداء الكليات بيقفوا فى طابور الكافيتريا ...في أوقات الذروة....زيهم زى اصغر طالب و الكل ملتزم بالدور...و مش ح أنسى مرة لقيت الكافيتريا زحمة اوى و اتضح ان ده سببه يافطة كبيرة مكتوب عليها لأول مرة سندويتشات فلافل....و أساسا الناس مش فاهمه ده إيه و مصنوع من إيه بس عندهم حالة انبعاج من الاختراع الجديد و متزاحمين بالرغم أن سعره كان أعلى من سندوتشات اللحمة و الفراخ!

كل مادة بيدرسها أكثر من استاذ و من حق الطالب يختار يدخل لمين و ده كان شيء مهم جدا خاصة لو بندرس معاهم لتانى مرة...و في نهاية التيرم و بعد أخر محاضرة للمادة مباشرة بيدخل ممثل لجنة الجودة...موظف حكومي مستقل غير تابع للجامعة... و بيوزع أوراق فيها أنواع أسئلة مختلفة ليكتب الطلاب رأيهم في الأستاذ و مدى استفادتهم من شرحه و من المادة و المقترحات ... و مع مرور الوقت عرفت أهمية تلك الخطوة اللي كان بينتج عنها أحيانا عدم تجديد عقد الاستاذ مع الجامعة.

طبعا ما فيش داعي أتكلم عن النظام و النظافة أو جودة التعليم و نوعيته و إمكانيات الجامعة سواء العلمية أو الترفيهية أو الخدمية أو الأنشطة المتوفرة لكن أجمل شيء أن الطالب له حقوق كتير بتحميه و لو مثلا حدث و شعر الطالب بظلم من نتيجة امتحان فكان الإجراء المتبع انه يخاطب الأستاذ و إن لم يقتنع الطالب فمن حقه و دون اى حساسيات يقدم طلب لتقديم ورقته للجنة محايدة من خارج الجامعة ليبت فى الأمر خلال أسبوع كحد أقصي و لو ثبت انه مظلوم فعلا ياخد حقه و اعتذار كمان و إن ثبت إن الأستاذ كان على حق فلا يضر الطالب و ينتهي الموضوع عادى.

و كان فيه صندوق للاقتراحات و الشكاوى و في نهاية كل شهر نجد منشور به رد على كل اقتراح أو شكوى و كتير كان فيه أشياء بتتغير و ده كان بيزرع فينا الايجابية و روح الانتماء للجامعة.

لم يكن يجرؤ احد أن يسأل الأخر عن جنسيته أو ديانته و لا تكتب تلك المعلومات في اى اوراق داخل الجامعة أنما لو حد حب يقول لوحدة خلاص...على فكرة دى جامعة حكومية!

اتحاد الطلبة كان قوى و له كلمة مسموعة جدا و الانتخابات كانت الكترونية و طبعا نزيهة بجد مش زى ابله نزيهة اللي عندنا و كل واحد حر ما لم يضر او يخترق القوانين...و كل واحد في حالة و لا يحدث أن يحدق احد في الأخر...يعنى مثلا فيه كانوا بيلبسوا هدوم قليله جدا و تقريبا نقدر نقول خيوط مش قماش و لكن ولا حد بيضايقهم و لا بيبصلهم أساسا مع إن كان فيه طلبة من افغانستان و بعض العرب و يمكن اللي لفت نظري أن لاحقا بدأت تظهر طالبات سعوديات و الغريب إن السمة العامة كانت المبالغة في العرى و الماكياج عكس مثلا الطالبات اليابانيات أو الكوريات.

في تلك الجامعة أدركت أن أهمية البيئة التعليمية من أهمية جودة التعليم نفسه لأنها كفيلة بترسيخ مفاهيم أساسية و بتساعد على تكوين شخصية الطالب.

و البيئة فى الجامعة نجحت في أنها تغرس فينا الإحساس بالاعتزاز بالنفس و قوة الشخصية و غرست فينا معنى العدل و المساواة و التعددية و أن الإنسان له حقوق و واجبات و أن الحرية حق مش منحة.