دايما بنسمع عن حلاوة الحب و جمال الحب و فوائد الحب للصحة النفسية و البدنية!
لكن ما حدش بيكلم عن اضراره ... اذا كان الأدوية نفسها ليها اثار جانبية
معقول الحب مالوش اضرار؟
امال الجرحى و القتلى اللى بيسقطوا دول ايه؟
فيه مطرب مش فاكرة اسمه بيقول الحب عذاب...طيب ازاى؟ هل لو له اضرار يبقى حب؟ هو مش المفروض ان الحب ده شىء بيبهج و يسعد و يريح عشان كده بيغنوا له ...و لا عادى يبقى عذاب و وجع بحيث اننا ننظر له على انه مزيج من عده اشياء
خلينا نتفق على ان مافيش تعريف محدد للحب و انه شىء نسبى و كل شخص ممكن يكون له تعريفه الخاص و كمان كل مرحلة حياتية الاحساس فيها بالحب بيكون مختلف...يعنى حب المراهقة غير حب النضج و الحب قبل الخطوبة غير فى الخطوبة و غير بعد الجواز....و حتى بعد الجواز بسنه غير بعده بعشرين سنه مثلا
و جايز اصلا ما يكونش فيه شىء اسمه حب و ربما اللى بيطلق عليه الاسم ده هو شعور بالارتياح او التوافق او العشرة او الارتباط او المودة او كلهم مع بعض و جايز برضة يكون كل ده بيتوصف بكلمة واحدة هى الحب
مش عارفه و لا ادعى اى معرفة؟
ربما يكون الحب خيال او وهم نعيشه لنستمتع
وربما يكون حقيقة نعيشها او رمز يبقى بداخلنا
عموما اى ان كانت التعريفات أو الاضرار و الخسائر بس برضة ح نفضل نحب و الحب ح يفضل موجود
لانه أجمل شىء فى الوجود
لانه أجمل شىء فى الوجود
اولا حلوة قووووووي الاغنية
ReplyDeleteثانيا زي ماقلتي الحب ده حاجة نسبية بتختلف من حد للتاني
يعني واحد بيشوف انه لما يحب حد فده معناه انهم يبقوا حاجة واحدة مايفترقوش كل واحد عايش جوا التاني
وفيه واحد بيشوف الحب من بعيد لبعيد يعني انا اه بحبك بس انا ليا حياتي
لا ده غلط ولا ده غلط
انما كل واحد بيحب بطريقته
المهم في الاخر ان الاتنين يبقوا متوافقين ومرتاحين لده
ومايبقاش طرف فيهم ييجي علي التاني علشان خاطر نفسه ولا ييجي علي نفسه قوي علشان التاني
لأنه لو حس بكدة وحس انه عمال يدي يدي من غير مايلاقي مقابل هاييجي وقت ويلاقي نفسه تعب قوي وماعادش قادر يدي لأنه مش لاقي مقابل من الطرف التاني
الكلام ده سواء كان هو فعلا كدة او بس مجرد احساسه انه بيدي من غير مقابل لأنه ممكن يكون العكس اللي بيحصل بس هو حاسس بكدة
سيبك
مش مهم كل ده
المهم ان الحب علاقة متبادلة بين اتنين
كل واحد فيهم بيشوف ايه بيريح التاني ويعمله
وايه بيتعبه ومايعملوش
طبعا علي قد مايقدر ومن غير مايعاير التاني بأني بعملك وبعملك وانت مابتعملش
رغيت كتير
بس مش فاكر انا قلت ايه
يالله خير
اظن ان اجمل كتاب تعرض للحب وتعريفه وعلاماته
ReplyDeleteكتاب طوق الحمامة في الالفة والاف
لابن حزم الاندلسي
رائع الحقيقة
تحياتي
انا اتفق معاكى ان الحب ليه اضرار والضرر الى انا اتصبت بيه بسبب الحب انى مش عارف احب تانى حتى ولا عارف اواجه اى بنت اصلا بعد حبى الوحيد انا مش بسمى ده نوع من انواع الاخلاص ولكن انا بسميه انو كان حب لأن مش كل الى حب يقول انا بحب
ReplyDeleteوالله عندك حق ياقلبى
ReplyDeleteوكتير اضراره بتكون اكتر من فوايده
حلوو الموضوع جدا لانه طرح فكرة جديده
وحلووو الكليب
انا كنت ناويه انزل ضمينى
لان بعشق ايمان البحر درويش
سعيده اووووووووووى
لان ازاوقنا قريبه
تحياتى
الاغنية جامدة جدا ده اولا
ReplyDeleteبصى ياستى الحب ده فعلا حاجة نسبية وكل واحد بيعرفه بطريقته وبيتعامل مع حبيبه من خلال الطريقة دى
انما الاعراض الجانبية فهى واحدة على ما اعتقد
فى حب و هايفضل موجود و هو حالة روحية و انسانية راقية بس مش موجودة فى مجتمعنا لاسباب تتعلق بالزحمة و روتين الحياة و تخلفها ايضاً لكن الحب موجود و هو علاقة سامية جدا لكنها متعبة شوية برضه لان اللى بيحب بيفكر دايما فى حبيبه عشان كده بيبقى دايما مشغول
ReplyDeleteحبيبت قلبى
ReplyDeleteيالهووووووى على الاغنيه دى
بموووووت فيها
يالله ليها ذكريات جميله معايا
يسلم اختيارك
جميله جداااااا
وكلامك كله صح ومعاكى
الحب ليه اضرار بس وجودة لازم فى حياتنا من غير الحب منقدرش نعيش
مافى اجمل من الاحساس بالحب ولا اروع منه ولو مش موجود بندور عليه إما نلاقيه او لاء
الحب ليس له أضرار ولكن له عشاق .. لم يعرفوا طعم الحب الحقيقي
ReplyDeleteأيوه كده ياتيرز
ReplyDeleteحب وأحساسيس
بوست لزيز وخفيف
خرجتينا شويه من السياسه ومشكلها
وبعدين بتقوليلى انى حسستك انك هيتقبض عليكى العصر
بعد الشر عنك
بس بجد الحب شئ جميل صعب اوصفه بكلمات
لو وصفت الحب
محتاج ميت تعليق
الحب اه منه اه
عزاب احيانآ
مؤلم احيانا
فاشل احيانآ
بس جميل فى اغلب الاوقات
ممتع فى كل الحالات
منشط لكل متاعب الدنيا لو كان حب متبادل وصادق
الحب هو الحب وهيفضل طول عمره الحب
حلو بجرحه بفرحه بمره بعسله
حب
والقلب من غير حب كالزرع بدون ماء
كالعليل بدون دواء
ربنا يوعدك بالحب الصادق لكى تعيشى اجمل مافيه
ويبعد عنك اسوء مافيه
بوست رائع
تقبلى تحياتى لشخصك الطيب
محمــد التركــى
اولا : الاغنيه جميله قوى يسلم اختيارك
ReplyDeleteثانيا : الحب صعب تقيمه فهو اسمى شئ فى الوجودولا يوجد له اضرار والعذاب اللى بيحصل ده بسبب البعد او فقدان الحبيب وليس الحب المزروع فى القلب
ولا يمكن ان يعيش الانسان بدون حب
فاذا جسدنا الحب فتتجسد فى لفظ واحد وهو الله
ف الله محبه
فما اعظم هذا الحب ولا يوجد له مثيل
ربنا يزرع فى قلوبنا الحب
المشكله مش في الحب المشكله فينا احنا
ReplyDeleteانا اله الوجد رب الهيام
ReplyDeleteاضرب بسهم الوهم وهم الغرام
وهم الغرام من كتر ماهو جميل
ضربت انا فى قلبى جميع السهام
عجبى؟؟
طول ما المحب فى حالة الحب لا يشعر بشىء على راى الست امر عذاب و احلى عذاب ولكن بعد ان يخف لهيب الغرام يشعر المحب و يتالم
تحياتى ابراهيم رزق
ابقى كدابه لو قولتلك ان الحب ده جميل الحب هم
ReplyDeleteكل فلسفة الرجال لا تعادل واحدة من عواطف المرأة
ReplyDeleteدموع المرأة طوفان يغرق فيه أمهر السباحين
دموع المرأة اقوى نفوذآ من القوانين
تعرف المرأة الطيبة مما تفعل
و يعرف الرجل الطيب مما لا يفعل
المرأة اقدر على حفظ سرها من سر غيرها
المرأة اعدى اعداء المرأة
بيت بلا امرأة كجسم بلا روح
Manamino
ReplyDeleteمتفقة مع التحليل ده بشكل كبير
sendbad
اهلا بك و مرحبا
MSMO
اكيد عملة نادرة ان لم تكن منقرضة
adel
اهم شىء ان كل طرف يدرك ان الطرف الاخر سيكون اكثر حساسية فى التعامل معه دون غيره لانه يتوقع منه ما هو اعلى من الجميع
Haytham Alsayes
شكرا على المعلومة يا هيثم
ادم المصرى
اذا كان الادوية ليها اثار جانبية يبقى الحب لازم يكون له
جايدا العزيزي
عشان يبقى الحب صحى لازم فوائده تكون اكتر من اضراره
richardCatheart
متفقة معاكى جدا يا قلب القطة
nissan
وصفك دقيق فعلا
Ahmed Helmy
فى البوست ده بقصد حب الرجل و المرأة بس
Noha Saleh
ربنا يبعد الاعراض الجانبية دى
elmasryeffendi
ما نقدرش نقول انه مش موجود فى مجتمعنا
اكيد بالرغم من صعوبات الحياة بس اللى يدور ح يلاقى الحب
الحب الجميل
احنا اساسا مضطرين نعيش بس منغير الحب نعيش بلا روح
ELVIRA
معاكى بس اكيد فيه تعب برضة و لو على فترات
rack-yourminds
لا ارى مشكلة فى الزمالة او الصداقة الفكرية
Ms Venus
يا اهلا بيكي يا فينوس
انا بسعد بوجودك جدا و بحس ان الدنيا بخير
re7ab.sale7
صح يارحاب..عذوبة و عذاب
المجهول
مش عارفه
محمد التركى
المدونة متنوعه و فيها كل شىء و اكيد مش سياسة بس زى ما حياتنا فيها كل شىء و سعيدة ان البوست عجبكم
mrmr
ربنا ينعم على كل الناس بيه عشان يبقوا مسالميين و صافيين
BenBaz
جايز ده يكون صح
sal
شكرا على دعمك سال
ابراهيم رزق
الحب يحتاج الى عقل حتى يكون على اسس سليمة و يعيش
resalatye
سيتحول لهم لو كانوا الطرفين غير مناسبيين لبعض
amiralcafe
لو استطاع الرجل ان يضمن للمرأه الراحة سيضمن لنفسه السعادة
. الحب هو اساس الحياه وبدونه لا نستطيع ان نحيا وعلى من وجد الحب الحقيقى ان يحافظ عليه بكل ما يملك لانه ان ضاع ضاعت معه طعم الحياه.... احب اسجل اعجابى بالمدونه واتمنى ليك التوفيق
ReplyDeleteالحب ده حاجة ملهاش تعريف محدد ولا معايير نمشى عليها يا ترى بنحب فلان ده ليه عشان طيب ولا حنين - كان فيه واحدة صاحبتى اتقدملها واحد كان بيحبها من زمان وكانت عارفة كدة وكان راجل أوى وحنين بس هيه رفضته رفض قاطع وقالت مش حاسة ناحيته بحاجة
ReplyDeleteالحب ده حاجة مش عارفين بتحصل ليه ولا بتبتدى امتى ولا امتى هتنتهى .... ولا ليه بنحب أوى الشخص اللى أصلا مش بيحبنا ده ولا معبرنا
عارفة فيلم حب البنات ...أشرف عبد الباقى طول الفيلم كان بيكرر جملة "هوه الحب بغباوته... هنفضل ندور عليه فى كل مكان"...
انا اكبر مشكله حصلت في حياتي واللي صعب تتكرر تاني كانت بسبب اللي انا حبتها وعشان وثقت فيها دمرت حياتي وضيعت حتى الان سنتين من عمري ويا عالم ايه تاني هيضيع مني بسبب اني اتغبيت وحبيت اكيد انا لو عايش لوحدي من غير حبيب ما كنتش هخسر كل اللي انا خسرته
ReplyDelete