من غير لف و دوران اكيد مش قصدى حب الوطن و لا حب العمل!
مبدئيا ماعنديش اى اجابة محددة او مؤكدة للسؤال ده....لكن اعتقد ان مش هو اللى فى اغانى الفيديو كليب او الافلام و لا بتاع عصير الليمون و عد النجوم....لان هنا مش عايزة اخلط بين الحب و المراهقة بالرغم ان الاتنين كتير بيختلطوا و بيلخبطونا حتى لو ماكناش فى سن مراهقة
بس اكيد الحب شعور جميل و ايجابى لازم يخلى الواحد سعيد و عنده رغبه فى الحياه..... يعنى لو الواحد كرهه حياته او بقى تعيس يبقى مش بيحب؟ مش عارفه برضة انما جايز.......لكن لو عملت عاقلة و اكلمت بالمنطق يبقى ح اقول مافيش شىء اسمه حب لوحده انما فيه مجموعة من المعطيات المنطقية و المشاعر الانسانية مع مرور الوقت بتتبلور و تزداد عمقا و تبقى اللى بيسموه حب...يعنى هو شعور بالارتياح و الميل و الصداقة و المودة و السعادة عند مجرد سماع سيره الاخر مش بس التواصل معاه..... ممكن يكون جزء منه مدفوع برغبه انسانية طبيعيه و ممكن يكون احتياج للاحتواء او المشاركة...هو احساس بالهدوء فى وجود الاخر المفروض يدعمه اقتناع العقل بالتكافء بين الطرفين و بعد كل ده يكلل بزواج او بشىء يقبله المجتمع لكن فى النهاية مرور الوقت و المواقف مع العشرة هى بس اللى ممكن توصل بكل ده لانه يبقى حب.....لان الحب مش كلمة انما فعل و معنى عميق....و الدليل ان فيه كتير بيقولوا انهم بيحبوا بعض و يفضلوا فى حالة هيام.....او وهم....بالسنين و بعدين يسيبوا بعض....يبقى ده حب؟ لا طبعا دى حالة نفسية او احتياج نفسى لان كتير عقلنا بيصورنا ان كل اللى بنحلم بيه موجود فى الشخص الاخر و بيعمينا عن الحقيقة التى قد تكون واضحة جدا للاخرين اللى مش واقعين تحت تاثير التنويم المغناطيسى اللى بيطلق عليه مجازا حب
الحب زى الدهب....معدن نفيس بيدوم او على راى محمد فؤاد الحب الحقيقى بيعيش يا حبيبى ...بينسينا امبارح... بيعلمنا نسامح...بيخلينا نفكر فى ايامنا اللى جاية...لو نزعل ثوانى بيرجعنا تانى
بس برضة ده مش صح اوى لان الحب مش زى الدهب لان الدهب سهل نسبيا نلاقيه لكن الحب الحقيقى او من يستحق الحب و يقدر يحرك مشاعرنا و يقدرها و تدوم معاه كمان و يثبت نجاحه على مر السنين فده تقريبا معجزة فى زمن انتهت فيه المعجزات....هل ده معناه ان مافيش حاجة اسمها حب اصلا وان انا نسفت كل الحدوته كده؟
يجوز!
No comments:
Post a Comment