النهاردة كنت ناوية اكلم فى موضوع تانى خالص لكن بعد التعليقات على البوست قبل اللى فات و شوية حاجات شفتها على كام بلوج خليتنى احس ان أحسن اعلق هنا مرة واحدة.البوست قبل اللى فات كنت بكلم فيه عن التحرش و المعاكسات و ازدياد الظاهرة فى مصر تحديدا و العالم العربي عموما...و اللى عايزة اعلق عليه النهاردة هو أن فيه كتير من النساء قالوا انهم قرروا تغطية شعورهم فقط لتجنب مثل تلك الاشياء لكن هذا لم يفلح و اخريات قالوا انهم غطوا شعرهم فقط بسبب ضغط المجتمع و التحرش جزء منه و البوست ده للرد عليهم.
مبدئيا انا شخصيا لا يفرق معايا الستات تتحجب ام لا فكل انسان حر مادام لن يضر و لن يكفر الاخر او يعامله باستعلاء و انا مقتنعه انه لا علاقة لتغطية الشعر بالاسلام - لانه اكبر من ذلك كثيرا- و لكن المهم تبقى المرأه مرتاحة و راضية و مقتنعه.
و بالتالى هنا عايزة اوضح ان الحجاب و النقاب لم يثبتوا فاعلية فى الحد من المعاكسات طبقا لمحاضر الشرطة لانها مشكلة أمنية مش مشكلة زي المرأة و سبق و ضربت مثل بالنساء فى اوروبا و كيف يكون نفس هذا المتحرش ماشى هناك بأدبه و حتى لو كان فيه تحرش فى كل بقاع الارض فمش بصورة اللى فى مجتمعاتنا و انا سافرت و جربت و فاهمه بقول ايه و كمان الفرق ان عندهم قانون و يطبق بسرعه...يبقى انتى مش مضطرة تغطى شعرك عشان التحرش لكن ممكن تستخدمي اسلحة اخرى لا يعاقب عليها القانون و لكن تحميكي:
مثلا اى مبيد حشرى بيبقى لطيف اوى فى العين لو واحد غتت و قرب منك و ح يتهور و مش عايز يمشى بالذوق....و دى وسيلة جربتها احدى صديقاتى و نجحت نجاح باهر.
كمان أبر التريكو الطويلة المدببه اللى عادى تبقى فى شنطتك رائعه جدا بالذات فى مناطق معينه!و اخيرا و ليس اخرا كعبك العالى على دماغ اى غبى مش قادر يحترم نفسه و يحترم رجولته و مصمم يتعامل كحيوان او حشرة فمش معقول نمنع حريته فى الاختيار لكن وجب الرد عليها.
أما بالنسبة لموضوع ضغط المجتمع...فالمجتمع هو اسرتك و المحيطين بيكى فى العمل و غير كده ماحدش له عندك حاجة...ولو ان اصلا من الاول ماحدش له عندك حاجة مادم انتى فوق واحد و عشرين سنه طبقا للقانون المصري ...بس لاننا مجتمعات مازالت تعانى من التخلف و الناس حشرية بطبعهم و سمة المتأسلمين تحديدا التسلط على الخلق فحصرت ضغط المجتمع فى اسرتك و الشغل.
و هنا بقول ثقافتك ومنطقك و قوة حجتك هى سلاحك و عندك هنا كتاب للمستشار سعيد العشماوى و فيه مناظرة مع شيخ الازهر و قريب ح انشر ملخصة فى صفحتين و كمان عندك البحث الازهرى ده و طبعا عندى اكتر بس دول كفاية حاليا... هى مش ندوة!
الحقيقة انا شخصيا لم احتاج لاستخدام اى من وسائل منع التحرش لان غالبا المعاكس بيبقى غبى و جبان...طبعا مادام قبل انه يتصرف زى الحيوانات و عارف انه بيعمل حاجة غلط...و غالبا الموضوع لا يتعدى كلام فيقوله و يعدى و اتجاهله و خلاص ..و لكن بعترف ان للاسف ما شفتش كثافة للحكاية دى قد مصر بالرغم انى سافرت بره دول اسلامية و بوذية كمان بس الفرق هو القانون و ليس الزى و لا الاخلاق لاننا لن نضمن اخلاق كل فرد فى المجتمع.
اما موضوع الحجاب فللاسف برضة مش لاقيه حد يطلع لى فى شارع و لا شغل و لا من اى مكان يكلمنى فيه مع انى بحب اوى اكلم مع اى حد فكرة مختلف...كله تدريب لمواهبي... ..جايز لان شكلى باين عليه انى مش ضعيفة و لا سهلة و جايز لانى متصالحة مع نفسى و راضيه عنها فمن صغرى محافظة على صلاتى و صومى لكن كمان مش ببطل قراءه و بحث فى كل الاديان لغاية ما اكتشفت قد ايه الاسلام جميل و بسيط و مختلف عن ما يروج له المدعين على الفضائيات وعن ما نراه اليوم من تسلط و تطرف و ارهاب و ضعف...ارجعوا لكتب الشيخ محمد عبده و هو عالم ازهرى مستنير....او راسلوا الشيخ الازهرى الدكتور مصطفى راشد او الشيخ الازهرى الدكتور ابراهيم السايح او الدكتورة زينب رضوان عميد كلية الدراسات الاسلامية بجامعة القاهرة فرع الفيوم و عضو مجلس الشعب و هى بالمناسبة غير محجبة و كان لها برنامج أسبوعي على الفضائية المصرية من حوالى سنتين. الغريب ان اول موضوع وضعته فى ملفى عن قضية الحجاب كان و انا فى الابتدائية و كنت قرأته فى مجلة روز اليوسف و اعجبنى...بس بجد لو حصل و حد ناقشنى اكيد ح اقدر ارد عليه و فى النهاية لا احد يستطيع اجبارى لان التسلط ليس من الاسلام و اللى بيجبر و يستخدم القوة و التخريب و الارهاب حتى و ان كان معنوي ليسوا مسلمين بل ضعفاء لا حجه لهم و لا منطق ...لان المسلم من سلم الناس من يده و لسانه اولا و يجب ان يضرب مثال فى اعمال العقل لان اول كلمة نزلت فى القرآن هى اقرأ و آيات كثيرة حثتنا على التدبر و التعقل فالمسلم الحقيقي هو من يتسم بالتسامح و احترام بل و قبول الاخر.
عزيزتى دموع: الحمد لله أن اللى زيك لسة موجود وبيعطينا الأمل فى أن لسة فيه أمل فى مصر ومش مجرد بنمشى ورا أى كلام من غير تفكير ووجود وجهة نظر او حتى نفكر شوية فى الكلام دة وهل دة الاسلام فعلا واللا لا وميرسى على مواضيعك كلها... طبعا أنا معاكى فى كل شئ بس المبيد دة صعب شوية أفرض الواحد مش قاصد وبيهزر يبقى ضيعنا مستقبله . ليه بس العنف دة
ReplyDeleteالى ابو عمر المصري
ReplyDeleteانا اللى بشكرك على زيارتك و تشجيعك و تاكد ان فيه مسلمين كتير مستنيرين و متحضرين لكن بعضهم هاجر و طفش و بعضهم ساكت خوفا من المجتمع و البعض الاخر اضطر ينافق للاسف و ما تبقى مبعثر بس ادينا بنحاول نجمع بعض لان تلك بلدنا و هذا دينا و الاثنان يتم خطفهم و تشويههم بابشع صور و ربنا يهدى الجميع لما فيه الخير
اما موضوع المبيد و ليه العنف فده لان التحرش نوع من العنف ضد المرأة و مادام لا يوجد قانون فالعنف سيقابلة عنف و انا قلت يستخدم لو واحد غتت و قرب و ح يتهور و مش عايز يمشى بالذوق يعنى هو اللى اختار بالثلث
كمان انا بعتز بعقلى جدا لان ربنا كرم الانسان بالعقل
ReplyDeleteأعجبتنى جملتك هذه فى الرد على احد التعليقات
ففعلا هو العقل الذى يميزنا عن باقى المخلوقات فكيف نعطله ولا نعمله فى أمور الحياة قبل أن تنفذ ونتحسر على ما قضيناه من وقت فى تسطيح وتشويه لجميع الأمور ولنا حديث لاحق ان شاء الله
شكرا نوسة و شرفتى المدونة :)
ReplyDeleteطيب يا Tears دة كلام بعض استاذة فى الازهر يعنى ليس كل استاذة الازهر و سواء هولاء او هولاء فليس كلامهم منزل من السماء هى اراء لاشخاص قد تصيب او تخطاء يبقى ندع كل انسان يختار ما يناسبة و يتقبلة و ان كنتى تقبلتى صاحب الفكر المختلف عنك مثل الملحد او القبطى الذى اقصدة بالمسيحى طيب ما تقبلى ايضا بمن تتحجب او تلبس النقاب ما المانع.و كما قلت لك فى تعليق سابق لماذا نركز على قطعة من القماش اهى فرض ام سنة ام اى شىء وترك اشياء اخرى اهم بكثير و هى تدهور حالة البلد من كافة الجوانب ثقافى علمى زراعى كل شىء يا tears فليتحد اصحاب قطعة القماش مع من لا يرتدى هذة القطعة من اجل مصر وبعد كدة نبقى نقعد وناقش بمزاج.بمانسبة المبيد الحشرى هل يصح ان يكون العقاب اكبر من الذنب عندما كنت صغير وامشى بجوار اختى الاكبر منى قبل ان تتزوج اتى شاب راكب دراجة بسكلتة يعنى و عليها هذا الشىء الذى يضعوا فية اللبن هو موزع لبن وعاكس اختى لا اذكر ماذا قال.لكنى اخذتنى النخوة و قمت بضرب البسكلتة فوقع على الارض وسكب اللبن وبكى فهو بالتاكيد عامل.بعد مرور الايام حزنت من اجلة فلم يكن العقاب فى مستوى الذنب.اوعى يضيق صدرك من كثرة مرورى و تستعملى معى هذا المبيد
ReplyDeleteلا ادرى لماذا عقلك يذهب فى ناحية معاكسة انا شخصيا اعطيت صوتى لمحمد البرادعى فى التصويت الذى وجدتة فى مدونتك اهو اراهابى اننى اقول نتتحد اعنى كل الشرفاء من من يلبس او من لا يلبس
ReplyDeleteKontiki
ReplyDeleteاهلا بيكي دايما
بعتلك ايميل
شكرا على مرورك و يارب زميلتك تكون رجعت بالسلامة
ان الحكومة همشت دور الاحزاب وقضت على جميع من يعارضها ولذلك ظهر الاخوان فى الانتخابات السابقة لو ان هناك دورا فاعلا للاحزاب وكانت هناك انتخابات نزيهة فلن يفوز الاخوان باكثر من ثلث الاصوات لانهم ليسو متوغلين بشكل كبير كما يعتقد البعض انما كان ظهورهم بسب عدم وجود معارضة حقيقية
ReplyDeletetears
ReplyDeleteصباح الخير
رجعت بس اخدت لها كام يوم اكتئاب
:(
الى الوفيه للابد- مها أحمد
ReplyDeleteشرفتى المدونة و متشكرة جدا لتشجيعك و بجد كلامك كسفنى