عقبال ما يتفك باقى النحس

زغروووووودددددة

يا الف نهار ابيض ..يا الف نهار مبروووووك ......اخيرا يا أولاد اتضح فعلا ان لا يأس مع الحياة و لا حياه مع اليأس و ان زمن المعجزات لسه ما انتهاش و لا حاجة زى ما كنا فاهمين و موهومين سنين

اخيرا و بعد طول انتظار و معاناه و شقا و كفاح و صبر و جلد من الفين و سبعه... فيه "حد" اعرفه خلاص ربنا كرمه من وسع اوى اوى اوى و فك النحس عنه و اخد ..............رخصة العربية.....اه و الله....اخيرا

ايه ده ...خلاص انا كنت قربت اتعقد و ماكانش ح ينفع معايا لا دكاترة و لا مشعوذين...كنت بدأت اتعقد من منظر العربيات و احقد على الاسفلت و اغير من الكاوتش و بقيت مش طايقة حد يقولى ما تتعلمى سواقه و كنت بفكر اقدم على رخصة المحمول الرابعه أسهل

لا مش بهزر بجد تلت سنين معاناه مع الرخصة لدرجة ان الحد ده خد ماجستير و دخل على الدكتوراه و بقى نابغة و برضة نحس الرخصة ماكانش عايز يتفك

ايه ده باين كان فيه حد عامله عمل على ضفر قرد دايخ و مخ ضفدعه مطلقة من فيل مجوز تلاته منهم واحدة مش على بعضها

الف الف مبروك و عقبال يااااا رب...... رخصة الأتوبيس السياحي اللى يخبط باقى النحس